Նոր ուսումնական ծրագրում ամբողջությամբ պահպանվել է եկեղեցու պատմությունը․ Անդրեասյան
Եկեղեցին մտահոգություն ունի, որ դպրոցում առանձին առարկա չունենալը կվտանգի կարևոր գիտելիքն ու արժեքները, իսկ մանկավարժության տեսանկյունից այդ մտավախությունը չկա. նոր ուսումնական ծրագրում ամբողջությամբ պահպանվել են կրոնի և եկեղեցու պատմության մասին գիտելիքները, թեկուզ առանց առանձին առարկայի։ Այս մասին ԱԺ-ում 2022-ի բյուջեի կատարողականի հաշվետվության քննարկումների ժամանակ ասել է Ժաննա Անդրեասյանը։
ԿԳՄՍ նախարարը նշել է, որ նոր ծրագրում եկեղեցու պատմության և հայ ժողովրդի կյանքում նրա դերի մասին գիտելիքները տրվում են պատմության դասերին, իսկ դավանանքի մասին գիտելիքները ՝ հասարակագիտության դասերին:
«Ավելին` եթե նայեք 5-6–րդ դասարանների «Ես և իմ հայրենիքը» առարկային (որը ավագ դասարաններում կոչվում է «Հասարակագիտություն») այնտեղ մեր ծեսերի, տոնակատրությունների մասով շատ կարևոր գիտելիքներ կան, որոնք մենք փորձում ենք նաև կիրառելի, արժեքային դարձնել, ինչպես նաև դաստիարակության հիմք։ Այստեղ տոները, ծեսերը նշելու մասին է գրված, օրինակ` ինչպես է պետք նշել Բարեկենդանը»,–ասել է նախարարը։
Հիշեցնենք՝ ՀՀ ԿԳՄՍ-ի որոշմաբ «Հայ եկեղեցու պատմությունը» որպես առանձին առարկա չի լինելու և ներառվելու է «Հայոց պատմություն» առարկայի դասագրքում։
