Գերմանիայի փոխկանցլերի գրասենյակ սպիտակ փոշով ծրար է առաքվել

Գերմանիայի Դաշնային Հանրապետության փոխկանցլեր, տնտեսական հարցերի և կլիմայի պաշտպանության նախարար Ռոբերտ Հաբեկի («Կանաչներ»)՝  Ֆլենսբուրգում գտնվող գրասենյակ սպիտակ փոշով ծրար է առաքվել: Այս մասին տեղեկանում ենք ТАСС-ից:

Ծրարն ստացվել է մայիսի 24-ի երեկոյան։ Գրասենյակի աշխատողներն այն տարել են ոստիկանության բաժանմունք, ուր իրավապահ մարմինների աշխատակիցները կանչել են հրշեջների։ Քանի որ նյութի բնույթը եղել է անհայտ, աշխատակիցներին տարհանել են շենքից, իսկ դրա շուրջն ընկած տարածքը՝ շրջափակել։ Այնուհետև հրշեջները, պահպանելով բոլոր նախազգուշական միջոցները, ծրարը դուրս են տարել այնտեղից։

Նշվում է, որ ներկայում փոշին ուսումնասիրվում է վտանգավոր քիմիական կամ ռադիոակտիվ նյութերի պարունակության նպատակով։ 

Ինչպես հայտնել է ոստիկանությունը, մինչ այժմ ծրարի հետ շփված անձանց մոտ առողջական խնդիրներ չեն առաջացել։ Բացառված չէ, որ փոշին իրենից ներկայացնում է սովորական ավազ։ Հետազոտության արդյունքներն առայժմ չկան: