44-օրյա պատերազմի մասնակիցը իր հետ բերված զենք-զինամթերքը պահել է Կորեայի ձորում

ՀՀ Ներքին գործերի նախարար Վահե Ղազարյանն ու ՀՀ ՆԳՆ Ոստիկանության պետ ոստիկանության գեներալ-մայոր Արամ Հովհաննիսյանը Ոստիկանության կոլեգիայի նիստերի ժամանակ ոստիկանության ծառայողներին հանձնարարել են, որ Ոստիկանությունը ակտիվ պայքար տանի ազգաբնակչության հետ, որպեսզի քաղաքացիներն իրենց մոտ պահվող զենք-զինամթերքը կամավոր հանձնեն իրավապահներին։ Այս մասին գրում է Shamshyan.com-ը։

Երեկ՝ մայիսի 18-ին, ժամը 23․00-ի սահմաններում, անհայտ քաղաքացին ահազանգել է Ոստիկանության օպերատիվ կառավարման կենտրոն և հայտնել, որ ինքը արցախյան 44-օրյա պատերազմի մասնակից է, և իր հետ բերված զենք-զինամթերքը թողել է Կորեայի ձորի կամրջից 100 մետր հեռու գտնվող աղբատարի մոտ։

Ինչպես հայտնում է ֆոտոլրագրող Գագիկ Շամշյանը, օպերատիվորեն ժամանել են ՀՀ ՆԳՆ Ոստիկանության Արաբկիրի բաժնի օպերատիվ խումբը և ՀՀ ՆԳՆ Ոստիկանության պարեկային ծառայության Երևան քաղաքի գնդի 1-ին գումարտակի պարեկները։

Ոստիկաններն ու պարեկները նշված վայրում հայտնաբերել են 1 հատ ինքնաձիգ, 3 հատ պահեստատուփ, 6 հատ  նռնակ, 1 հատ ավտոմատի խզակոթ, 3 հատ կցորդիչ,  2 հատ ականանետ և 3 հատ պոլիէթիլենային տոպրակով լցված տարբեր տրամաչափի փամփուշտներ։

Դեպքի փաստով Ոստիկանության Արաբկիրի բաժնում նախապատրաստվել են նյութեր և դրանք փոխանցվել են Հայաստանի քննչական կոմիտեի Երևան քաղաքի քննչական վարչության Արաբկիրի քննչական բաժին, որտեղ դեպքի փաստով նախաձեռնվել է վարույթ։