Ճարտարագիտական համալսարանի Գյումրու մասնաճյուղից 22 անձ հայտնվել են մեղադրյալի աթոռին. «Հրապարակ»
Ճարտարագիտական համալսարանի Գյումրու մասնաճյուղից 22 անձ հայտնվել են մեղադրյալի աթոռին կաշառք տալու ու վերցնելու համար։ Այս մասին գրում է «Հրապարակ» թերթը:
Ըստ նախաքննության՝ 2 տարի առաջ՝ փետրվարից մինչև հունիս, ստուգարքների, քննությունների ու դիպլոմային աշխատանքների գնահատականներ նշանակելու համար դասախոսները պահանջել և ուսանողներից ստացել են մինչեւ 100 հազար դրամի չափով կաշառք:
Մեղադրյալները մեղքը չեն ընդունում, ըստ փաստաբանի` նրանցից նախաքննական մարմինը ճնշումների միջոցով փորձում է ցուցմունքներ կորզել:
Ուսանողներից մեկը թղթակցին ասել է.
«Գործ են հարուցել ինչ-որ մեկի ձայնագրությունների հիման վրա, որից չի էլ հասկացվում, թե ով ում ինչ է ասում։ Նույնիսկ կոնկրետ գումարի անուն չեն տալիս, ու հիմա, պատկերացնո՞ւմ եք՝ էսքան մարդու քաշել են մի պատմության մեջ: Չնայած որ չափահաս ենք, մեր ծնողներին են տանում-բերում, թե գումարը դուք եք տվել»:
