Օմսկում գտնվող ամենամեծ նավթավերամշակման գործարանը դադարեցրել է աշխատանքը

Ռուսաստանի ամենամեծ բենզին արտադրող Օմսկի նավթավերամշակման գործարանը դադարեցրել է նավթի վերամշակումը ուկրաինական անօդաչու թռչող սարքի հարվածից հետո, հաղորդում է Reuters-ը ՝ հղում անելով նավթարդյունաբերության երկու աղբյուրների։

Նրանց տվյալներով՝ երկուշաբթի օրվա հարձակման ժամանակ հրդեհ է բռնկվել և վնասվել է CDU-10 նավթավերամշակման հիմնական բլոկը։ Այն կազմում է գործարանի հզորության մոտ 38%-ը՝ օրական 24,580 տոննա արտադրողականությամբ։ Հարակից CDU-11 բլոկը միաժամանակ անջատվել է։ Այն անմիջական վնաս չի կրել, սակայն դրա գործունեության համար կարևոր մի քանի գործընթացային բաղադրիչներ անջատվել են։ Աղբյուրների տվյալներով՝ CDU-11-ը, որը շահագործման է հանձնվել 2023 թվականին, կարող է շուտով վերսկսել աշխատանքը։ Միասին երկու բլոկները կազմում են նավթավերամշակման գործարանի հզորության մոտ 75%-ը։

Վլադիմիր Պուտինի Սիբիրի լիազոր ներկայացուցիչ Անատոլի Սերիշևը հաստատել է վնասի մասին տեղեկությունները, պարզաբանելով, որ աշխատակիցների շրջանում վիրավորներ չկան: Նա, սակայն, չի մանրամասնել, թե ինչպես է միջադեպը ազդել գործարանի գործունեության վրա:

Հուլիսի 7-ին նավթավերամշակման գործարանը դադարեցրեց բենզինի և դիզելային վառելիքի վաճառքը Սանկտ Պետերբուրգի միջազգային ապրանքային բորսայում: Ռուսաստանի խոշորագույն բենզին արտադրող ընկերության փակումը սպառնում է սրել վառելիքի սուր պակասը: The Insider-ի հաշվարկներով ՝ հունիսի վերջին վառելիքի պակաս է գրանցվել Ռուսաստանի վերահսկողության տակ գտնվող 89 շրջաններից 88-ում: