Զելենսկու կինը կմասնակցի Չարլզ III-ի թագադրման արարողությանը

Ուկրաինայի նախագահ Վլադիմիր Զելենսկու կինը՝ Ելենան, ժամանել է Լոնդոն, որտեղ մասնակցելու է Մեծ Բրիտանիայի միապետ Չարլզ III-ի թագադրման արարողությանը, որը տեղի կունենա շաբաթ օրը՝ մայիսի 6-ին, հինգշաբթի հաղորդում է Sky News-ը։

Ավելի վաղ Բուքինգհեմյան պալատը հայտարարել էր, որ Չարլզ III-ի թագադրման արարողությանը կմասնակցեն 203 երկրների և տարածքների ներկայացուցիչներ, այդ թվում՝ մոտ 100 պետությունների ղեկավարներ։ Ընդհանուր առմամբ, արարողությանը ներկա կլինի ավելի քան 2000 մարդ։

«Նախագահ Զելենսկու կինը այստեղ է թագադրման համար, որը տեղի կունենա այս շաբաթավերջին»,- ուղիղ եթերում ասել է հեռուստահաղորդավարը։

2022 թվականի սեպտեմբերի 8-ին Շոտլանդիայում 96 տարեկան հասակում մահացել է Մեծ Բրիտանիայի թագուհի Եղիսաբեթ II-ը, ով երկիրը ղեկավարել է ավելի քան 70 տարի։ Արքայազն Չարլզը դարձավ թագավոր՝ վերցնելով Չարլզ III անունը։