Պուտինը թույլատրել է նավթ մատակարարել բարեկամ երկրներին անկախ գնային առաստաղից
Ռուսաստանի նախագահ Վլադիմիր Պուտինը թույլ է տվել նավթ և նավթամթերք մատակարարել բարեկամ երկրներին անկախ գնային առաստաղից՝ մինչև այս տարվա փետրվարի 1-ը կնքված պայմանագրերի համաձայն։ Այս մասին նշվում է պետության ղեկավարի հրամանագրում։
Ռուսական նավթի գների առաստաղը Մեծ Յոթնյակի երկրները սահմանել էին անցյալ տարվա դեկտեմբերին՝ այն 60 դոլար է մեկ բարելի դիմաց։ Նրանց համար, ովքեր այն գնում են սահմանված չափից ավել գնով, G7-ի երկրների ընկերությունները չեն կարող տրանսպորտային ծառայություններ մատուցել։ Նաև, դեկտեմբերից ԵՄ-ին ռուսական նավթի ծովային մատակարարումների էմբարգո է գործում։
Միևնույն ժամանակ Վլադիմիր Պուտինը հրամանագիր է ստորագրել, որով արգելվում է ռուսական նավթի և նավթամթերքի մատակարարումը այն գնորդներին, որոնց պայմանագրերը «ուղղակի կամ անուղղակի կերպով նախատեսում են գնագոյացման մեխանիզմի կիրառում»։ Արգելքը գործում է մինչև հուլիսի 1-ը։
