Իսրայելը պատրաստ է ցանկացած պատասխանի՝ Լիբանանի տարածքից հրթիռակոծությունից հետո․ Իսրայելի ՊՆ ղեկավար

Իսրայելի պաշտպանության նախարար Յոավ Գալանտը կարգադրել է պատրաստվել ցանկացած հնարավոր պատասխանի՝ Լիբանանի տարածքից հրթիռակոծությունից հետո, հայտնում է The Times of Israel-ը։
 

Հրատարակության համաձայն՝ Գալանտը իրավիճակի գնահատման նպատակով հանդիպում է անցկացրել Իսրայելի պաշտպանական կառույցների բարձրաստիճան ներկայացուցիչների մասնակցությամբ։ Հանդիպման ավարտին նախարարը պաշտպանության գերատեսչությանը հանձնարարել է մշակել կատարվածին «արձագանքելու բոլոր տարբերակները՝ նախքան ռազմաքաղաքական կաբինետի՝ երեկոյան նիստում իրավիճակը քննարկելը»։

Ավելի վաղ իսրայելական լրատվամիջոցները հայտնել էին, որ Իսրայելի հյուսիսը Լիբանանից հրթիռակոծությունների է ենթարկվել։ Իսրայելի պաշտպանության բանակը հայտնել է, որ երկրի ուղղությամբ արձակվել է առնվազն 34 հրթիռ, որոնցից 25-ը ոչնչացվել են հակաօդային պաշտպանության համակարգերի կողմից, հինգն ընկել են Իսրայելի տարածքում։

Իսրայելի պաշտպանության բանակի տվյալներով՝ հրետակոծության հետևում կանգնած են ՀԱՄԱՍ-ի պաղեստինյան խմբավորումները։