Ամուլսարի հանքի շահագործմամբ որքան գումար մուտք կլինի պետբյուջե. Քերոբյանը մանրամասնում է
Ամուլսարի հանքի շահագործմամբ տարեկան 30-40 միլիարդ դրամի մուտքեր կլինեն ՀՀ պետական բյուջե։ Այս մասին հայտնեց ՀՀ էկոնոմիկայի նախարար Վահան Քերոբյանը։
Նշենք, որ այսօր ՀՀ կառավարությունը, «Լիդիան Արմենիան» և Եվրասիական զարգացման բանկը եռակողմ փոխըմբռնման հուշագիր են ստորագրել Ամուլսարի հանքը կրկին շահագործելու վերաբերյալ։
Նախարարը վստահ է` Ամուլսարի շահագործումը էական մասնակցություն է ունենալու ՀՀ բյուջեի աճի մեջ։ Նրա գնահատմամբ` տարեկան Ամուլսարից ստացվող հարկերը 20 տոկոսով կավելացնեն հանքարդյունաբերության ոլորտից ստացվող եկամուտները։
«Բայց հարկերից առաջ այն տնտեսական արդյունքը, որը ձևավորելու է այս աշխատանքի արդյունքում` հարյուրավոր աշխատատեղերը, փոխգործակցությունը այլ ընկերությունների հետ և այն նոր մթնոլորտը, շինարարությունը ոչ միայն հանքի մասում, այլ նաև հարակից համայնքներում մեծ տնտեսական ազդեցություն է ունենալու»,–վստահ է նախարարը։
Միևնույն ժամանակ Քերոբյանը նշեց, որ ՀՀ կառավարության համար հանքարդյունաբերությունը գերակա ոլորտ չէ, և չեն փորձում տնտեսությունը զարգացնել ընդերքը շահագործելով, սակայն այն կարևոր ճյուղ է համարվում տնտեսության համար։
Նշենք, որ 2021 թվականի սեպտեմբերին պետությունը «Գեոպրոմայնինգ» ընկերությունից ստացավ Զանգեզուրի պղնձամոլիբդենային կոմբինատի բաժնետոմսերի 15%-ը։ 2022 թվականի մարտին բաժնետոմսերի ևս 6,875% նվիրաբերվեց։
Հիշեցնենք` Ամուլսարը ոսկու երկրորդ խոշոր հանքավայրն է Հայաստանում: Գտնվում է ՀՀ Վայոց Ձորի և Սյունիքի մարզերի սահմանագլխին, Զանգեզուրի լեռնաշղթայի հյուսիս, հյուսիսարևմտյան ճյուղավորումների ջրբաժանային մասում, 2500-2988 մ բացարձակ բարձրությունների վրա:
Այն ղեկավարում է «Լիդիան Արմենիա» ՓԲԸ-ն, որը միջազգային «Lydian international» ընկերության դուստր ձեռնարկությունն է:
Տևական ժամանակ է` հանքավայրը չի գործում։ Լիբանանյան «Էլարդ» ընկերությունն Ամուլսարի հանքի շահագործման ընթացքում իրականացրել էր շրջակա միջավայրի ռիսկերի գնահատում:
Ընկերության ներկայացուցիչները ուսումնասիրել էին դեռևս 2016 թ.-ին «Լիդիան Արմենիա» ընկերության պատրաստած շրջակա միջավայրի վրա ազդեցության գնահատումը և հայտարարել հնարավոր ռիսկերի մասին: Միևնույն ժամանակ Հայաստանի քննչական կոմիտեի ներկայացուցիչները նշել են, որ ռիսկերը կառավարելի են:
