Հայտնի է, թե երբ կփակվի «Մալաթիա» տոնավաճառը և որ դեպքում այն կվերաբացվի
Այսօր հայտնի դարձավ, որ «Մալաթիա» տոնավաճառի գործունեությունն առաջիկայում կկասեցվի, քանի որ տնտեսվարողը տեսչականի արձանագրած խախտումները չի վերացրել։
Auroranews-ը կապ հաստատեց Քաղաքաշինության, տեխնիկական եվ հրդեհային անվտանգության տեսչական մարմնի իրազեկման բաժնի պետ Ելենա Զոհրաբյանի հետ՝ հասկանալու, թե ի՞նչ խախտումների մասին է խոսքը և ե՞րբ է կասեցվելու տնտնեսվարողի գործունեությունը։
Զոհրաբյանը մեզ հետ զրույցում ասաց, որ տոնավաճառը պետք է փակվի մինչև այս ամսվա վերջ, քանի որ ՔՏՀԱ տեսչական մարմինը հայտաբերել է հրդեհային անվտանգության կանոնների թվով 17 խախտման դեպք։
«Ավելի վաղ տնտեսվարողին ժամանակ էր տրվել առկա խնդիրները վերացնելու և սահմանված նորմերը ապահովելու համար, որից հետո «Մալաթիա» տոնավաճառի տնօրենը կապ է հաստատել մեզ հետ և նշել, որ տոնավաճառում արձանագրված խնդիրները կարգավորված են։ Մեր աշխատակիցները կրկին ստուգայցի կատարել, որի ժամանակ արձանագրել են հրդեհային անվտանգության կանոնների խախտում, ինչից հետո որոշում է կայացվել կասեցնել տոնավաճառի գործունեությունն այնքան ժամանակ, քանի դեռ չեն պահպանվել բոլոր համապատասխան նորմերը»,- ասաց նա։
Զոհրաբյանի խոսքով՝ տնտեսվարողը կարող է գործունեություն ծավալել միայն առկա անվտանգային խնդիրները շտկելուց հետո։
