Մեծ Բրիտանիայում իրանական ԻՀՊԿ-ն կճանաչվի որպես ահաբեկչական կազմակերպություն
Մեծ Բրիտանիայի իշխանությունները պատրաստվում են առաջիկա շաբաթների ընթացքում Իսլամական հեղափոխության պահապանների կորպուսը (ԻՀՊԿ՝ Իրանի Զինված ուժերի էլիտար ստորաբաժանումները) ճանաչել որպես ահաբեկչական կազմակերպություն։ Այս մասին երկուշաբթի հայտնել է The Daily Telegraph-ը՝ հղում անելով աղբյուրներին։
Եթե Իսլամական հեղափոխության պահապանների կորպուսը ներառվի ահաբեկչական կազմակերպությունների ցանկում, ապա կորպուսին պատկանելը, ինչպես նաև նրա գործունեությանը մասնակցելը, կորպուսի խորհրդանիշները կրելը և դրա գործունեությանն աջակցելը Միացյալ Թագավորությունում քրեական հանցագործություն կդառնա։ Հրատարակությունը նշել է, որ Իսլամական հեղափոխության պահապանների կորպուսի` ահաբեկչական կազմակերպություն ճանաչելուն աջակցում են ներքին գործերի նախարար Սուելլա Բրավերմանը և նրա տեղակալ Թոմ Թուգենդհատը, ով համարվում է նախաձեռնության գլխավոր հեղինակը։
Ընդհանուր առմամբ, 2000 թվականից՝ համապատասխան օրենսդրության ընդունումից հետո, Մեծ Բրիտանիայում ահաբեկչական է ճանաչվել 78 կազմակերպություն։
Դեկտեմբերին Եվրամիությունը պատժամիջոցներ սահմանեց Իսլամական հեղափոխության պահապանների կորպուսի դեմ՝ «անմեղ մարդկանց նկատմամբ մահապատիժների և բռնությունների համար»: Մինչ այս ԵՄ իշխանությունները հայտարարել էին, որ դիտարկում են Իսլամական հեղափոխության պահապաններին ահաբեկչական ցուցակում ներառելու հնարավորությունը։ Միացյալ Նահանգները Իսլամական հեղափոխության պահապանների կորպուսը ներառել է ահաբեկչական ցուցակում 2019թ.ին:
