Էրդողանը մտադիր է Թուրքիան դարձնել գազի գնագոյացման գլոբալ կենտրոն

Թուրքիան ծրագրում է սեղմ ժամկետներում դառնալ գազի գնագոյացման գլոբալ կենտրոն: Այս մասին հայտարարել է երկրի նախագահ Ռեջեփ Թայիփ Էրդողանը Ստամբուլի շրջանում Սիլիվրի ստորգետնյա գազապահեստարանի նոր հզորությունների գործարկման արարողության ժամանակ:
 

«Մենք բանակցություններ ենք վարել Պուտինի հետ թուրքական տարածքում գազային հանգույց ստեղծելու հարցով։ Թրակիան կդառնա էներգետիկ կենտրոն։ Մեր նպատակն է սեղմ ժամկետում Թուրքիան դարձնել գազի գնագոյացման գլոբալ կենտրոն»,-ասել է նա։  
 

Հիշեցնենք, որ հոկտեմբերին ՌԴ նախագահ Վլադիմիր Պուտինը Էրդողանին առաջարկել է գազային հանգույց ստեղծել՝ Եվրոպա գազի մատակարարումների համար։

Թուրքիայի ղեկավարը լրագրողներին ասել էր, որ որքան հնարավոր է շուտ Թուրքիայում կստեղծվի միջազգային գազային հանգույց։ Նրա խոսքով, երկրի եվրոպական մասում գտնվող Թրակիան ամենահարմար վայրը կլինի հանգույցի համար։