Սպիտակ տան ազգային անվտանգության խորհրդի ռազմավարական հաղորդակցության համակարգող Ջոն Քիրբին ճեպազրույցի ժամանակ ասել է, որ Ուկրաինայի նախագահ Վլադիմիր Զելենսկին, ըստ ԱՄՆ-ի, պատրաստ չէ Ռուսաստանի հետ բանակցել իր երկրի շուրջ ստեղծված իրավիճակի շուրջ։ Այս մասին հայտնում է ՏԱՍՍ-ը։
 

Քիրբին նշել է, որ նախագահ Ջո Բայդենի խոսքերը ռուս գործընկեր Վլադիմիր Պուտինի հետ երկխոսության հնարավոր պատրաստակամության մասին չեն ենթադրում ուկրաինական հարցում ամերիկյան առաջնորդի դիրքորոշման փոփոխություն։
 

«Նախագահը երեկ հասկացրեց, որ մտադիր չէ խոսել Պուտինի հետ այս պահին։ Նա նաև ասաց, որ Պուտինը բացարձակապես հետաքրքրություն չի ցուցաբերում որևէ երկխոսության նկատմամբ»,- ասել է նա։
 

Ավելի վաղ ՌԴ նախագահի խոսնակ Դմիտրի Պեսկովը հայտարարել էր, որ Ռուսաստանի Դաշնության և ԱՄՆ-ի միջև բանակցությունները, որոնց մասին ավելի վաղ նշել էր ամերիկացի առաջնորդ Ջո Բայդենը, անհնար է, քանի դեռ ամերիկյան կողմը պնդում է ռուսական զորքերի դուրսբերումն Ուկրաինայից։