Սնոուդենը հավատարմության երդում է տվել Ռուսաստանին և անձնագիր ստացել

 ԿՀՎ-ի և ԱՄՆ Ազգային անվտանգության գործակալության նախկին աշխատակից Էդվարդ Սնոուդենը հավատարմության երդում է տվել Ռուսաստանին և ստացել ռուսական անձնագիր։ Այս մասին ՏԱՍՍ-ին հայտնել է նրա փաստաբան Անատոլի Կուչերենան։

«Այո, ստացել է անձնագիր, երդվել է»,- ասել է փաստաբանը։

Նա մանրամասնել է, որ Սնոուդենի կինը նույնպես դիմել է Ռուսաստանի քաղաքացիություն ստանալու համար, գրում է gazeta.ru-ն։

2013 թվականին Սնոուդենը, լինելով Միացյալ Նահանգների Ազգային անվտանգության գործակալության  աշխատակից, The Guardian և The Washington Post թերթերին գաղտնի տեղեկատվություն է տվել՝ կապված ամբողջ աշխարհի քաղաքացիների տեղեկատվական հաղորդակցության ամերիկյան հետախուզական գործակալությունների հսկողության հետ: Դրանից հետո նա փախել է Հոնկոնգ, իսկ հետո, հայտնվելով Շերեմետևոյի տարանցիկ գոտում, ՌԴ-ում ստացել քաղաքական ապաստան։ Այնուհետև նրան տվել են ժամանակավոր կացության թույլտվություն, իսկ հետո՝ անժամկետ։ Սնոուդենի խոսքով՝ նա ապաստան է խնդրել 27 երկրներում, սակայն Ռուսաստանից բացի բոլորը մերժել են իրեն՝ վախենալով ԱՄՆ-ի պատժամիջոցներից։