Կովկասյան տարածաշրջանում իրավիճակի զարգացման միտումները զգուշավոր լավատեսություն են ներշնչում, հայտարարել է ՀԱՊԿ գլխավոր քարտուղար Ստանիսլավ Զասը` բելառուսական ONT հեռուստաալիքի եթերում։ Գրում է «Ազատությունը»:

«Հատուկ ուշադրություն է դարձվել (ՀԱՊԿ երևանյան գագաթնաժողովում) իրավիճակին, որը զարգանում է ինչպես գլոբալ հարթությունում, այնպես էլ ՀԱՊԿ պատասխանատվության ոլորտում: Եթե մեծ հաշվով նայենք կովկասյան տարածաշրջանում տիրող իրավիճակին, ապա այժմ այնտեղ ձևավորվող միտումները զգուշավոր լավատեսություն են ներշնչում, բոլոր մասնակիցների կենտրոնացումը այս տարածաշրջանում խաղաղության հասնելու, խաղաղության պայմանագրի ստորագրման, գոյություն ունեցող սահմանների օրինական գրանցման, տրանսպորտային կապերի ապաշրջափակման վրա: Այս տարածաշրջանի երկրները գնում են այս ճանապարհով», - ասել է Ստանիսլավ Զասը։

Մյուս կողմից, նա նշել է, որ իրավիճակը շատ ծանր է։

«Առաջին հերթին Հայաստանի և Ադրբեջանի սահմանին, գրեթե ամեն օր փոխհրաձգություններ են լինում, բարդ իրավիճակ է»,- նշել է ՀԱՊԿ գլխավոր քարտուղարը։

Հիշեցնենք, որ ՀԱՊԿ գլխավոր քարտուղարի պաշտոնում Ստանիսլավ Զասին 2023թ-ից կփոխարինի Ռուսաստանում Ղազախստանի նախկին դեսպան Իմանգալի Տասմագամբետովը։