«Ալիևը մանիպուլյացիաներ է անում, փորձում է արցախահայությանը վախեցնել, ռուսներին է հարվածում». Բաբայան

Ալիևի այդ բոլոր հայտարարությունները հայատյացության արդյունք են, նաև՝ հակառուսականության արդյունք։ Այս մասին 168.am-ի հետ զրույցում ասել է Արցախի Հանրապետության արտաքին գործերի նախարար Դավիթ Բաբայանը` մեկնաբանելով Ալիևի` Շուշիից արված ռազմատենչ հայտարարությունները:

«Այս հայտարարությունները համընկնում են Ուկրաինայում պատերազմական գործողությունների ընթացքի հետ։ Երբ Ուկրաինայում ռուսական կողմի համար որոշակի դժվարություններ են առաջանում, Ալիևը սկսում է ակտիվանալ, ուշի ուշով հետևում ու սպասում են Ռուսաստանի պարտությանը՝ ցանկանալով օգտվել այդ ամենից։

Արցախում տեղակայված ռուս խաղաղապահների մանդատին դեռևս 3 տարի կա, վաղ է խոսել նրանց Արցախում մնալու ժամկետի երկարաձգման կամ հակառակի մասին։ Ալիևը, իհարկե, մանիպուլյացիաներ է անում, փորձում է դիվիդենտներ շահել, արցախահայությանը վախեցնել, ռուսներին է հարվածում, սակայն դեռևս ժամանակ կա խաղաղապահների հարցը քննարկելու համար»,- նշեց Դավիթ Բաբայանը։