«Ուղիղ ասեք». Սիմոնյանը դիմել է Հայաստանին
«Россия сегодня» մեդիախմբի եւ RT հեռուստաալիքի գլխավոր խմբագիր Մարգարիտա Սիմոնյանը կոչ է արել Հայաստանի սահմանապահ ծառայությանը ուղիղ պատասխանել՝ արգելվա՞ծ է արդյոք նրա մուտքը հանրապետություն: Տեղեկատվությունը փոխացում է ՌԻԱ Նովոստին:
«Իմ անձնական կյանքի գաղտնիքները վաղուց բացահայտվել են երկրի ողջ դեղին մամուլում։ Այնպես որ, մի պտտվեք թեմայի շուրջը, ուղիղ ասեք», - ասել է Սիմոնյանը:
Լրատվականը գրում է, որ այսօր ԱԱԾ սահմանապահ զորքերի հրամանատար Արման Մուրադյանը գործակալության հարցմանն ի պատասխան հայտարարել է, որ Սիմոնյանի՝ երկիր մուտք գործելու արգելքի մասին տեղեկատվությունը «փոխանցել հնարավոր չէ, քանի որ այն պարունակում է անձնական բնույթի տվյալներ»:
Նա վկայակոչել է «Տեղեկատվության ազատության մասին» օրենքը, որի համաձայն՝ տեղեկությունների տրամադրումը մերժել կարելի է, եթե դա «խախտում է անձնական եւ ընտանեկան կյանքի գաղտնիքը, այդ թվում ՝ նամակագրության, հեռախոսային խոսակցությունների, փոստային, հեռագրական եւ այլ հաղորդումների գաղտնիությունը»:
