Հանդիպել են Դումանյանն ու Բրյուսովի անվան համալսարանի ռեկտորը. ինչ են քննարկել
ԿԳՄՍ նախարար Վահրամ Դումանյանն այսօր հանդիպել է Վալերի Բրյուսովի անվան պետական համալսարանի ռեկտոր Կարինե Հարությունյանի հետ: Այս մասին Auroranews.am- ին հայտնեց ԿԳՄՍ մամուլի քարտուղար Գեղամ Մելիքբեկյանը։ Մելիքբեկյանը մեզ հետ զրույցում նշեց, որ քննարկվել է առկա իրավիճակը` այլ մանրամասներ չներկայացնելով:
Երևանի Բրյուսովի անվան պետական համալսարանի ռեկտոր Կարինե Հարությունյանը համալսարանի գիտական խորհրդի ընդլայնված նիստում էլ հայտարարել է, որ Դումանյանն իրեն է փոխանցել 3 բուհերը միավորելու կառավարության որոշման նախագիծը: Նա նշել է, որ ԿԳՄՍ նախարար Վահրամ Դումանյանին է ներկայացրել դասախոսների, ուսանողների` 3 բուհերի միավորման վերաբերյալ սկզբունքային անհամաձայնությունը։
Հոկտեմբերի 12–ին ֆեյսբուքյան իր էջում Վ. Բրյուսովի անվան պետական համալսարանի սոցիալական գիտությունների և սերվիսի ֆակուլտետի դեկան Ցոլակ Ակոպյանը գրել էր, որ ԿԳՄՍ նախարարությունում գաղտնի նախագիծ է շրջանառվում, որով նախատեսում են փակել բուհը։
Այս լուրից հետո Բրյուսովի անվան պետական համալսարանի հարյուրավոր ուսանողներ դասադուլ հայտարարեցին և բողոքի ակցիա սկսեցին համալսարանի տարածքում։
