Ստեփանակերտի բնակիչը նռնակ է նետել ոստիկանի վրա

Ստեփանակերտի բնակիչը նռնակ է նետել ոստիկանության ծառայողների ուղղությամբ, ինչի հետևանքով ոստիկանը ստացել է մարմնական վնասվածքներ։ Տեղեկությունը հայտնում է ԱՀ ներքին գործերի նախարարության ոստիկանության մամուլի ծառայությունը։

Հաղորդագրությունում ասվում է, որ 32-ամյա Հ. Հ.-ի բնակարանում Ստեփանակերտի ՔՈՎ ուժեղացված խումբը հայտնաբերել է թմրանյութ։ Քաղաքացին, չենթարկվելով ոստիկանության ծառայողների օրինական պահանջներին, հանել է նռնակը և սպառնացել, որ եթե չհեռանան տնից, կպայթեցնի այն:

Հետո նա նռնակը ձեռքին լքել է տարածքը և թաքնվել «Մենք ենք, մեր սարերը» հուշակոթողի հարակից անտառային տարածքում։ Ստեփանակերտ քաղաքի և քրեական հետախուզության վարչությունների ծառայողները համատեղ իրականացրել են որոնողական աշխատանքներ։

«Հ.Հ.-ն, նկատելով ոստիկանության ծառայողներին, դուրս է եկել գլխավոր մայրուղի և նռնակը նետել ոստիկանության ծառայողների ուղղությամբ»,– ասված է հաղորդագրությունում։

Արդյունքում ոստիկանության լեյտենանտ Լեռնիկ Բալասանյանը ստացել է մարմնական վնասվածքներ։

Շտապօգնության օպերատիվ խումբն առաջին օգնություն ցուցաբերելուց հետո ոստիկանին տեղափոխել է հանրապետական բժշկական կենտրոն։ Նրա կյանքին վտանգ չի սպառնում։

Ոստիկանության ծառայողները Հ.Հ.-ին բերման են ենթարկել ոստիկանության Ստեփանակերտ քաղաքի վարչություն։ Կատարվում է քննություն։