ՏԵՍԱՆՅՈՒԹ. «Նրանք Հայաստանը ճանաչեցին Ադրբեջանի մաս». պատգամավորները շտապեցին ուղղել Փաշինյանին

«Մարդիկ կան, որ մեզ մեղադրում են Ղարաբաղը Ադրբեջանի կազմում ճանաչելու մեջ: Ես ուզում եմ հստակ արձանագրել՝ արդյոք Հայաստանի որևէ իշխանություն Ղարաբաղը ճանաչել է Ադրբեջանի կազմում և որ իշխանությունն է ճանաչել: Այո, ՀՀ-ն ճանաչել է Ղարաբաղը Ադրբեջանի կազմում և դա իրականացվել է ձեր հիշատակած Վարդան Օսկանյանի հեղինակությամբ, որովհետև այն պահին, երբ Հայաստանն ընդունել է Մադրիդյան սկզբունքները որպես բանակցությունների հիմք, այդ պահից սկսած՝ ճանաչել է Լեռնային Ղարաբաղը Ադրբեջանի կազմում»,- ԱԺ- Կառավարություն հարցուպատասխանի ժամանակ ասաց ՀՀ վարչապետ Նիկոլ Փաշինյանը: 

«Հիմա պետք չի հիստերիկ հայտարարություններ անել: Ավելին ասեմ՝ Վարդան Օսկանյանն է եղել, որ հրապարակային Հայաստանի Հանրապետությունը ճանաչել է օկուպանտ»,- ասաց Փաշինյանը՝ շարունակելով. «Այդ հայտարարությունները հնարավոր է, որ երբևէ չկարողանանք հաղթահարել, որովհետև էն ժամանակ ոչ թե Վարդան Օսկանյանն ու Ռոբերտ Քոչարյանն են ճանաչել Ղարաբաղը Ադրբեջանի մաս, այլ ՀՀ-ն է ճանաչել Ղարաբաղը Ադրբեջանի մաս: Թող լացակումած կամ խրոխտ ելույթներ չունենան: Եվ դա եղել է 2007 թվականին»: 

Նիկոլ Փաշինյանը ելույթի այս հատվածում լեզվի սայթաքում թույլ տվեց, ասելով. «Սերժ Սարգսյանն ու Էդվարդ Նալբադյան էլ են Հայաստանը ճանաչել Ադրբեջանի մաս»: Վարչապետին շտապեցին ուղղել պատգամավորները: Փաշինյանը շարունակեց.

«Ղարաբաղը...Ղարաբաղը, էդ հլը, բան ա, լեզվի սայթաքում չի, էստեղ ուրիշ խորքեր էլ կան, եթե ես ճիշտ լսեցի, թե ինչ ասեցի»:

Մանրամասները` տեսանյութում: