«Մենք օֆիցիալ պատերազմի մե՞ջ ենք Ադրբեջանի հետ». Սիմոնյանը` Տեր–Պետրոսյանի հայտարարության մասին

ՀՀ ԱԺ նախագահ Ալեն Սիմոնյանը լրագրողների հետ զրույցում նշեց, որ տեղյակ չէ, թե ինչ կապիտուլյացիոն պայմանագրի մասին է ասել ՀՀ առաջին նախագահ Լևոն Տեր–Պետրոսյանը։

«Ես չեմ հասկանում՝ ի՞նչ կապիտուլյացիայի մասին է խոսքը, և թե ինչու է պարոն Տեր–Պետրոսյանն այդ բառը դնում շրջանառության մեջ։ Թող ասի` ինչո՞ւ 90-ականների սկզբին, երբ ինքը հաղթանակած նախագահ էր, չստորագրեց այդ կապիտուլյացիան և չբերեց անկախություն Արցախին ու չճանաչեց այն։ Ի՞նչ կապիտուլյացիայի մասին է խոսքը, մենք օֆիցիալ պատերազմի մե՞ջ ենք Ադրբեջանի հետ։ Մենք խոսում ենք խաղաղության պայմանագրի մասին»,– ասաց Սիմոնյանը։

Ըստ Սիմոնյանի` այս պահին որևէ հստակ փաստաթուղթ չկա, դրանք ենթադրություններ են, և եթե Տեր–Պետրոսյանն ինչ–որ փաստաթղթի մասին գիտի, թող ասի՝ իրենք էլ իմանան։

Հիշեցնենք` Հանրային հեռուստաընկերությանը տված հարցազրույցում ՀՀ առաջին նախագահն ասել էր, որ ստորագրվելիք փաստաթուղթը լինելու է կապիտուլյացիայի պայմանագիր, և այն իրավիճակում, որ այժմ Հայաստանն է, պետք է բոլոր վատ լուծումներից գտնել պակաս ցավալին։