Հարյուրավոր ուկրաինացի զինվորականներ Գերմանիայում ուսուցումից հետո չեն վերադարձել Ուկրաինա

2022 թվականից ի վեր Գերմանիայում ռազմական պատրաստություն է անցել շուրջ 29 հազար ուկրաինացի զինծառայող, սակայն նրանցից ոչ բոլորն են վերադարձել Ուկրաինա։ Die Zeit-ի տվյալներով՝ հարյուրավոր զինվորականներ փորձում են մնալ Գերմանիայում։

Պարբերականի հաղորդմամբ՝ միայն Սաքսոնիա-Անհալթում հայտնի է ուսուցման ընթացքում կամ դրանից հետո զինծառայողների հեռանալու շուրջ 80 դեպքի մասին։

Ուկրաինական օրենսդրությամբ զորամասն ինքնակամ լքելը կարող է հանգեցնել քրեական պատասխանատվության, իսկ համապատասխան հանցակազմերի դեպքում պատիժը կարող է հասնել մինչև 12 տարվա ազատազրկման։

Die Zeit-ի տվյալներով՝ զինծառայողներից ոմանք Գերմանիայում ապաստան ստանալու հնարավորություն են դիտարկում։ Դրա համար նրանք պետք է հիմնավորեն, որ Ուկրաինա վերադառնալու դեպքում իրենց սպառնում է հետապնդում կամ լուրջ վտանգ։ Պարբերականը նշում է, որ ապաստան ստանալու գործընթացը կարող է տևել մոտ մեկ տարի, իսկ դրական որոշման հավանականությունը բարձր չի գնահատվում։

Զինվորականները Գերմանիայում մնալու տարբեր պատճառներ են նշել․ նրանցից մեկը պատմել է ղեկավարության կողմից վատ վերաբերմունքի մասին, մյուսը հայտարարել է, որ չի ցանկանում «սպանել և մեռնել», իսկ որոշները ցանկանում են միանալ ԵՄ երկրներում բնակվող իրենց ընտանիքներին։