«Նրանք սպառնում են, որ Թուրքիան գիշերը կգա». Հունաստանի վարչապետը պատասխանել է Էրդողանին

Այս շաբաթվա սկզբին ՄԱԿ-ի Գլխավոր ասամբլեայում իր ելույթի ժամանակ Հունաստանի դեմ հնչեցրած անհիմն հայտարարությունների հետ կապված՝ Հունաստանի վարչապետ Կիրիակոս Միցոտակիսը կոշտ պատասխան է տվել Թուրքիայի նախագահ Ռեջեփ Էրդողանին:

Միցոտակիսը Հունաստանի անվտանգությունը, կայունությունը եւ տարածքային ամբողջականությունը համարել է Աթենքի կարմիր գծերը թուրքական ագրեսիայի դեմ։ Այս մասին նա ասել է ՄԱԿ-ի Գլխավոր ասամբլեայի ամբիոնից իր ելույթում: Վերջինս անդրադարձել է Անկարայի ռեվիզիոնիստական ​​ծրագրին եւ տարածաշրջանում նրա ապակայունացնող դերին, ինչպես նաեւ կարեւորել  Անկարայից բխող սադրիչ հռետորաբանությունը։

Միցոտակիսն անդրադարձել է նաեւ հունական կղզիների վերաբերյալ Թուրքիայի անհիմն եւ անընդունելի մեղադրանքներին եւ դրանց ինքնիշխանության վերաբերյալ կասկածներին, ծովում եւ օդում խախտումներին, ինչպես նաեւ Հունաստանի դեմ համակարգված ապատեղեկատվության արշավին։ Նա նաեւ դատապարտել է բարձր մակարդակի շփումները դադարեցնելու Թուրքիայի միակողմանի որոշումը։

«Թվում է, թե Թուրքիայի ղեկավարությունը տարօրինակ մոլուցք ունի իմ երկրի նկատմամբ․․. Նրանք սպառնում են, որ Թուրքիան գիշերը կգա։ Սա ագրեսորի լեզու է»,-ասել է Միցոտակիսը։ «Ես կցանկանայի ուղղակիորեն դիմել թուրք ժողովրդին. Հունաստանը վտանգ չի ներկայացնում ձեր երկրի համար: Մենք ձեր թշնամիները չենք, մենք հարեւաններ ենք»,-ասել է Հունաստանի վարչապետը։   

«Գրեթե հիսուն տարի կիպրացիներն ապրել են բաժանված կղզում՝ անօրինական ներխուժման եւ ռազմական օկուպացիայի հետեւանքով»,-հավելել է նա։ 

Հունաստանի վարչապետի խոսքով՝ միջազգային հանրությունը չպետք է անտեսի Թուրքիայի անօրինական գործողությունները։