Հունաստանի ինքնիշխանությունն իր կղզիների նկատմամբ վիճելի չէ. Պետդեպը՝ Էրդողանին

Հունաստանի ինքնիշխանությունը իր կղզիների նկատմամբ վիճելի չէ: ԱՄՆ Պետդեպարտամենտը այսկերպ է մեկնաբանել Թուրքիայի կողմից հնչող մեղադրանքները, թե իբր Հունաստանը օկուպացրել է Էգեյան ծովի կղզիները: Այս մասին գրում է թուրքական artigercek.com-ը։
 

Պետդեպի ներկայացուցչի խոսքով՝ հատկապես Ուկրաինայում տեղի ունեցող իրադարձությունների ֆոնին արդյունավետ չեն այն հայտարարությունները, որոնք կարող են մեծացնել լարվածությունը ՆԱՏՕ-ի դաշնակիցների միջև։

«Միացյալ Նահանգները շարունակում է խրախուսել տարածաշրջանում խաղաղության ու անվտանգության պահպանման և վեճերը դիվանագիտական ճանապարհով լուծելու հարցում ՆԱՏՕ-ի դաշնակիցների միասին աշխատելը: Բոլոր երկրների ինքնիշխանությունն ու տարածքային ամբողջականությունը պետք է հարգվեն և պաշտպանվեն... Մենք կոչ ենք անում բոլոր կողմերին զերծ մնալ լարվածությունը խորացնող հռետորաբանությունից և գործողություններից»,- ասվում է հայտարարության մեջ։