Շվեդիան էներգետիկ ընկերություններին հարյուր միլիարդների երաշխիքներ կառաջարկի
Շվեդիան մի քանի հարյուր միլիարդ շվեդական կրոն կառաջարկի էներգետիկ ընկերություններին՝ լիկվիդայնության երաշխիքների տեսքով, որպեսզի օգնի խուսափել ֆինանսական ճգնաժամից այն բանից հետո, երբ ռուսական «Գազպրոմը» փակել է «Հյուսիսային հոսք 1» գազատարը, հայտարարել է վարչապետ Մագդալենա Անդերսոնը, հաղորդում է Reuters-ը:
Կառավարությունը կներկայացնի առաջարկ, որը թույլ կտա նրան վարկային երաշխիքներ տրամադրել, ասել է ֆինանսների նախարար Միքայել Դամբերգը՝ հավելելով, որ երկրի բոլոր խորհրդարանական կուսակցությունները եւ խոսնակը տեղեկացված են։
«Եթե մենք չգործենք, ֆինանսական համակարգում խափանումների լուրջ վտանգ կա, ինչը վատագույն դեպքում կարող է հանգեցնել ֆինանսական ճգնաժամի»,- ասել է Անդերսոնը:
Շվեդիայում դիտարկվում է ամենաբարձր գնաճը վերջին 30 տարվա ընթացքում, եւ կենտրոնական բանկն այս տարի արդեն երկու անգամ բարձրացրել է տոկոսադրույքները, իսկ մինչեւ տարեվերջ սպասվում է եւս մեկ կտրուկ աճ:
Էլեկտրաէներգիայի վարձերի բարձրացումը, տոկոսադրույքների բարձրացումը եւ տնտեսական աճի դանդաղումը սեպտեմբերի 11-ի համընդհանուր ընտրություններին ընդառաջ քարոզարշավի հիմնական թեմաներն են դարձել:
Դամբերգը հայտարարել է, որ կառավարությունն ակնկալում է 90 միլիարդ շվեդական կրոն (8,36 միլիարդ դոլար) ստանալ, որպեսզի այս եւ հաջորդ տարի սպառողներին կարողանա օգնել էլեկտրաէներգիայի ռեկորդային գները հաղթահարելու հարցում:
