Արցախի Քաշաթաղի շրջանի Բերձոր քաղաքում 3 ընտանիք է մնացել, բայց անհատ մարդիկ էլ շատ կան, մոտ 30 հոգի քաղաքում են դեռ։ Այս մասին 24News-ին ասել է Բերձորի քաղաքապետ Նարեկ Ալեքսանյանը։

Նա ասաց, որ այս օրերին գերեզմանների արտաշիրիմում էլ է իրականացվել, խաչքարերը վաղուց տեղափոխել են Բերձորից․ Խաղաղության հրապարակից այսօր հանվել է զինվորի հուշարձանը. «Տները հիմնականում մնացել են այնպես, ինչպես  կային։ Բնակիչները մասամբ իրենց ունեցվածքը տարել են։ 5 ընտանիք տեղափոխվել է Արցախ, մնացածը՝ Հայաստան»։

Քաղաքապետն ասաց, որ բերձորցիներին դեռեւս նոր բնակարան գնելու սերտիֆիկատ չի տրվել, դեռեւս հստակ չէ՝ որտեղ են մշտական բնակվելու։

Հիշեցնենք, որ Ադրբեջանը ռուս խաղաղապահների միջոցով տեղեկացրել է, որ մինչեւ օգոստոսի 25-ը Քաշաթաղի շրջանի Լաչին քաղաքի, Աղավնո և Ներքին Սուս գյուղերի բնակիչները լքեն իրենց տները։ Ադրբեջանական կողմն այս պահանջը ներկայացրել է Հայաստան Արցախի կապող նոր ճանապարհի՝ իր հատվածի շինարարությունն ավարտելու պատճառաբանությամբ։