Ադրբեջանի գլխավոր խնդիրներից մեկը Արցախի ապառազմականացումն է. դա վերաբերում է ոչ միայն Արցախից Հայաստանի գրանցում ունեցող զինծառայողների դուրսբերմանը, այլ առհասարակ  Արցախի ռազմականացված կառույցների զինաթափմանը: Այս մասին NEWS.am-ի հետ զրույցում նշեց ԱԺ «Պատիվ ունեմ» խմբակցության պատգամավոր Տիգրան Աբրահամյանը:

«Երկրորդը, վերաբերում է Հայաստանն Արցախին կապող միջանցքին, որովհետեւ արդեն պարզ է դառնում, որ Ադրբեջանը ոչ միայն երթուղի է փոխում, այլ միջանցքը փաստացի վերածում է ճանապարհի, որի արդյունքում բավականին մեծ անվտանգային խոցելիություն է լինելու այդ ճանապարհով երթեւեկողների համար:

Մյուս խնդիրը վերաբերում է Բերձորի, Սուս եւ Աղավնո գյուղերի հանձնմանը: Դա Ադրբեջանի համար ունի մեծ նշանակություն եւ նրանք փորձում են այս փուլում ապահովել Ալիեւի ռազմաքաղաքական հաղթանակը: Եվ չորրորդը, հիմք է նախապատրաստվում մեծացնելու ճնշումը Հայաստանի տարածքով այսպես կոչված, «Զանգեզուրի միջանցքի» ապահովման ուղղությամբ, ինչը կրկին խոստանում է լարված իրադրություն ստեղծել»,-ասաց նա:

Ընդդիմադիր պատգամավորը ցավով արձանագրեց, որ Ադրբեջանը եւ 2018-ից հետո, եւ 2020-ի 44-օրյա պատերազմից հետո նաեւ Թուրքիայի ակտիվ սատարմամբ բավականին հաշվարկված գործում է եւ քայլ առ քայլ սահմանափակում Հայաստանի որեւէ ճկունություն դրսեւորելու հնարավորությունը:

Ինչ վերաբերում է Նիկոլ Փաշինյանի հայտարարությանը, թե հենց այս պահին էլ Ադրբեջանը կարող է ՀՀ տարածքով գնալ դեպի Նախիջեւան՝ ՀՀ օրենսդրությամբ սահմանված կարգով, Տիգրան Աբրահամյանն ասաց. 

«Ակնհայտ է, որ այս պահին ընթացող գործընթացների հաղթահարումից հետո հաջորդ գլխավոր թիրախը դառնալու է այսպես կոչված, Զանգեզուրի միջանցքը»: Այս պարագայում Հայաստանի իշխանությունը փորձում է ներկայացնել իրավիճակ, որը բխում է տարածաշրջանային ապաշրջափակման տեսանկյունից, իսկ այն ենթադրում է բոլոր տիպի կոմունիկացիաների բացում: ՀՀ վարչապետի ակնարկները վերաբերում էր այդ ճանապարհի օգտագործման հնարավորություններին, այլ ոչ միջանցքի տրամադրմանը»: