Կոսովոյի վարչապետ Ալբին Կուրտին հայտարարել է, որ Կոսովոյի եւ Մետոհիայի հյուսիսում 9 բարիկադ է տեղադրվել, Պրիշտինան ակնկալում է, որ մոտ ապագայում դրանք բոլորը կվերացվեն, փոխանցում է ՏԱՍՍ-ը։ 

Բացի այդ, նա բողոքի ակցիաների նախօրեին փողոց դուրս եկած Սերբիայի քաղաքացիներին մեղադրել է ոստիկանների վրա կրակելու եւ ագրեսիայի մեջ։   

Մինչդեռ Սերբիայի արտաքին գործերի նախարար Նիկոլա Սելակովիչը հայտարարել է, որ իրավիճակը Կոսովոյում վերջին 24 ժամվա ընթացքում ավելի հանդարտվել է, սակայն այն դեռեւս մնում է ծայրահեղ փխրուն։ «Երեկվա համեմատ իրավիճակը կարծես թե մի փոքր ավելի հանգիստ է, քան նախկինում էր, բայց այն շարունակում է մնալ շատ, շատ փխրուն»,-ասել է նա։ 

Կիրակի երեկոյան եւ երկուշաբթի գիշերը Կոսովոյի հյուսիսում անկարգություններ են տեղի ունեցել՝ կապված Պրիշտինայի կողմից սերբական համարներով եւ փաստաթղթերով մուտքի արգելքի հետ: Արգելքը պետք է ուժի մեջ մտներ օգոստոսի 1-ից։ Ինքնահռչակ հանրապետության իշխանությունները՝ ԱՄՆ-ի կոչից հետո, մեկ ամսով հետաձգել են սերբական համարներով եւ փաստաթղթերով մուտքի արգելքը։ Սերբիայի նախագահ Ալեքսանդր Վուչիչը երկուշաբթի երեկոյան ասել է, որ ակնկալում է Կոսովոյում լարվածության թուլացում։