Ռադիո Ավրորան 17 տարեկան է․ շնորհավոր ծնունդդ, սիրելի ռադիոկայան

Ուղիղ 17 տարի առաջ այս օրը՝ հունիսի 14-ին, եթեր հեռարձակվեց նոր ռադիոկայան՝ ռադիո «Ավրորա»-ն: Երբ հետ ենք նայում, միայն զարմանալ կարելի է, թե ինչպես եւ ինչից ենք սկսել, ինչ դժվարությունների ու բարդությունների միջով անցել: Այս տարիների ընթացքում միայն ու միայն առաջ ենք գնացել՝ դառնալով յուրաքանչյուր մարդու, ռադիոլսողի լավագույն ընկերը: Ռադիո «Ավրորա»-ն փոխել է հայերի պատկերացումը, թե ինչպիսին պիտի լինի այսօրվա՝ 21-րդ դարի ռադիոկայանը: 

Մեր թիմի շատ սիրելի գործընկերն է «Քիսս ՖՄ»-ը, որը ռադիոալիքների շարքում իր ուրույն տեղն ունի եւ արդեն մրցակցում է հաճախականությունների հնաբնակների հետ: Այս տարի մեր թիմին է միացել ռադիո «Ջազ»-ը, որը բոլորիս համար եթերային նոր գույն է բերել։ Այս 17 տարիների ընթացքում 100.7 հաճախականությամբ տասնյակ նախագծեր ու ծրագրեր են հեռարձակվել: Մի փոքրիկ գաղտնիք բացենք՝ հենց այսօրվանից մեր եթերում նոր նախագիծ է լինելու։ 

Վստահ ենք, որ այն եւս կդառնա ձեր սիրելին: 17 տարիների ընթացքում մեր աշխատանքն իրականություն է դարձել մեր ռադիոլսողների եւ գործընկերների շնորհիվ: Իսկ ռադիո «Ավրորա»-ի աշխատակազմն այս տարիների ընթացքում կոփվել է, դարձել թիմ: Անհամեստություն չլինի ասել՝ փորձառու թիմ: Անխափան եթեր, ռադիո «Ավրորա»։