Ողբերգական ավտովթար՝ Արարատի մարզում. 8-ամյա տղան մահացել է, կան վիրավորներ
Այսօր՝ մարտի 24-ին, խոշոր ու ողբերգական ավտովթար է տեղի ունեցել Արարատի մարզում։ Ժամը 02։00-ի սահմաններում Մասիս-Էջմիածին ավտոճանապարհի 4-րդ կմ-ին՝ Նիզամի-Սայաթ-Նովա գյուղերի խաչմերուկում Երևանի բնակիչ՝ 30-ամյա Բաղդասար Գ-ն իր վարած Opel Vectra մակնիշի ավտոմեքենայով դուրս է եկել երթևեկելի գոտուց ձախ, բախվել գազատար խողովակի երկաթե հենասյանը, կոտրել այն, առաջ ընթանալով բախվել հուշաքարին, կոտրել այն և գլխիվայր շրջվել։
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով վարորդ Բաղդասար Գ-ն և ուղևոր Սյուզաննա Հ-ն մարմնական վնասվածքներով տեղափոխվել են, «Էրեբունի» բժշկական կենտրոն, իսկ մյուս ուղևորներ՝ Արմավիրի մարզի բնակիչ, 26-ամյա Աննա Գ-ն և Երևանի բնակիչ՝ 8-ամյա Ալեքս Գ-ն տեղափոխվել են «Սուրբ Աատվածամայր» բժշկական կենտրոն։ Հիվանդանոց տեղափոխվելու ճանապարհին Ալեքս Գ-ն, գիտակցության չգալով, մահացել է։
Ֆոտոլրագրողը հայտնում է, որ 2016 թվականի փետրվարի 23-ին նշված վայրում տեղի էր ունեցել ողբերգական ավտովթար, ինչի հետևանքով 3 երիտասարդ, որոնցից մեկը զինվոր էր, մահացել էին, և կոտրված հուշաքարը նրանց հիշատակին էր տեղադրվել։
