«Ժամանակի ընթացքում նրանք կհասկանան՝ ինչ է կատարվում». Պեսկովը` ՌԴ քաղաքացիների կարծիքի մասին է խոսել

Ռուսաստանի կողմից Ուկրաինայում հատուկ ռազմական գործողություն իրականացնելու որոշումը չողջունող քաղաքացիները փոքր թիվ են կազմում, հայտարարել է ՌԴ նախագահի մամուլի խոսնակ Դմիտրի Պեսկովը՝ ճեպազրույցի ժամանակ և հավելել, որ ժամանակի ընթացքում նրանք կհասկանան՝ ինչ է կատարվում։ 

«Ուկրաինայում հատուկ ռազմական գործողություն անցկանցնելու որոշմանը չաջակցող ՌԴ քաղաքացիները քիչ են, քաղաքացիների գերակշռող մեծամասնությունը, ավելի քան 75 տոկոսը, աջակցում են հատուկ գործողության անցկացմանը, աջակցում են ՌԴ նախագահ Վլադիմիր Պուտինի գործողություններին»,- ասել է Կրեմլի ներկայացուցիչը։ 


Նրա խոսքով՝ ներկայացված տվյալները ստուգված են և փաստարկված։ 

«Մարդկանց ակտիվորեն բացատրում են այս գործողության նպատակներն ու պատճառները։ Մենք հույս ունենք, որ նրանք, ովքեր համաձայն չեն, կհասկանան՝ ինչ է կատարվում։ Շատ կարևոր է, որպեսզի համաձայնություն չհայտնողներն, այնուամենայնիվ, սկսեն կողմնորոշվել ստի այն մեծ հոսքում, որն Արևմուտքից է գալիս, հասկանան, որ իրենց մատուցվող նորություններում ամեն ինչը չէ, որ ճիշտ է»,- ասել է Պեսկովը։ 


ՌԴ նախագահի մամուլի խոսնակը նշել է նաև, որ հատուկ գործողության անցկացումը սխալ համարող քաղաքացիները ՌԴ բնակչության 25 տոկոսից ավելի քիչ են։ 

«Անկասկած, նրանց կարծիքը լսում են, բայց, այնուամենայնիվ, փոքրամասնությունը մնում է փոքրամասնություն»,- ասել է Պեսկովը։