«Ռուս ժողովուրդն ունակ է հայրենասերներին տարբերակել դավաճաններից»․ Պուտինի նոր հայտարարությունը

Ռուսաստանի ժողովուրդը կկարողանա հայրենասերներին տարբերակել դավաճաններից, հասարակության այդպիսի զտումը միայն կամրացնի երկիրը, ՏԱՍՍ գործակալության հաղորդամամբ՝ հայտարարել է ՌԴ նախագահ Վլադիմիր Պուտինը։ 

«Ցանկացած ժողովուրդ, հատկապես ռուս ժողովուրդը, միշտ կկարողանա իրական հայրենասերներին տարբերակել դավաճաններից, և դրանց պարզապես դուրս թքել բերանից՝ այնտեղ պատահականորեն հայտնված ճանճի պես։ Համոզված եմ, որ հասարակության բնական և անհրաժեշտ ինքնամաքրումը միայն կուժեղացնի մեր երկիրը, մեր համերաշխությունը, համախմբվածությունն ու ցանկացած մարտահրավերի արձագանքելու մեր պատրաստակամությունը»,- ասել է Պուտինը։ 


ՌԴ նախագահի խոսքով՝ Ռուսաստանը գիտակցում է, թե ինչ ռեսուրսների է տիրապետում «ստի կայսրություն» Արևմուտքը, բայց այդ «կայսրությունն» անզոր է՝ ընդդեմ ճշմարտության ու արդարության։ 

«Մոսկվան հետևողականորեն շարունակելու է իր դիրքորոշումը հայտնել ամբողջ աշխարհին, իսկ մեր դիրքորոշումը բաց է ու անկեղծ»,- ասել է նա։