Վերջին շրջանում իրավիճակը լարված է․ Պաշտպանության փոխնախարար
ՊՆ փոխնախարար Արման Սարգսյանն այսօր լրագրողների հետ զրույցում վստահեցրեց, որ հակառակորդը Հայաստանի սուվերեն տարածք չի մտել.
«Ես կոնկրետ վայրով չասեմ, վերջին շրջանում իրավիճակը լարված է, կարող ենք բնորոշել որպես կայուն լարված, որովհետև ամսի 13-14-ի գիշերվանից և այսօր ևս, թեև մենք լուրջ խնդիրներ չենք ունեցել, բայց իրավիճակը շարունակում է մնալ լարված։ Խոսքը Սյունիքի մասին չէ, Արցախի հատվածում է լարվածությունը, սակայն ձեռնարկվում են միջոցներ, որպեսզի բանակցությունների և այլ գործողությունների միջոցով հնարավոր էսկալացիայի խնդիրներ չծագեն»,- ասաց նա:
Անդրադառնալով Արցախում ստեղծված հումանիտար ճգնաժամին՝ Արման Սարգսյանը նշեց, որ ադրբեջանական կողմի այս քայլերը ընդհանուր խուճապային, վախի մթնոլորտ ստեղծելու, հայաթափման գործընթաց նախաձեռնելուն միտված քայլեր են։
«Քայլեր են արվում, որ լարված վիճակը պահպանվի: Ես առավոտվա դրությամբ կարող եմ ասել, որ իրավիճակը կայուն է: Մեր ստորաբաժանումները զգոն են, հետևում են ընթացքին և անհրաժեշտության դեպքում կանխարգելիչ միջոցառումներ կիրականացնեն»,- ասաց նա:
Հարցին, թե Արցախում ավելի լայն ռազմական գործողությունների վտանգ տեսնու՞մ է արդյոք, փոխնախարարը պատասխանեց. «Ես չեմ կարող բացառել որևէ սադրանք, որևէ մեկը չի կարող բացառել: Կապված աշխարհաքաղաքական փոփոխությունների հետ միգուցե հնարավոր սադրանքներ, քայլեր հակառակորդի կողմից ձեռնարկվեն, սակայն կարող եմ վստահ ասել, որ մեր կողմից որևէ ագրեսիվ քայլ չի իրականացվում»,-ասաց ՊՆ փոխնախարարը:
