Ռուսաստանում հաշիվներ չունեն, որ արգելափակվեն. Սպիտակ տան արձագանքը՝ ռուսական պատժամիջոցներին

Միացյալ Նահանգների իշխանությունների այն ներկայացուցիչները, որոնք հայտնվել են ՌԴ-ի պատժամիջոցների ցուցակում, ՌԴ այցեր չեն ծրագրել, այնտեղ հաշիվներ չունեն: Այս մասին հայտնել Է Սպիտակ տան պաշտոնական ներկայացուցիչ Ջեն Փսակին:

«Այնպես որ, մենք առաջ ենք շարժվելու»,–ասել է նա:

Փսակին նշել է, որ Ռուսաստանի կողմից սահմանված պատժամիջոցների ցանկում հայտնված անձանցից ոչ ոք չի պլանավորել տուրիստական նպատակներով Ռուսաստան ուղևորություններ կատարել, չունի բանկային հաշիվներ, որոնց հասանելիությունը կարելի է արգելափակել:

Ավելի վաղ հայտնի էր դարձել, որ Ռուսաստանն անհատական պատժամիջոցներ է սահմանել ԱՄՆ-ի ղեկավարների և նրանց հետ կապված անձանց նկատմամբ:
 

Ըստ Ռուսաստանի ԱԳՆ-ի՝ մարտի 15-ից ռուսական «սև ցուցակում» փոխադարձության հիմքով ներառվում են ԱՄՆ նախագահ Ջո Բայդենը, պետքարտուղար Էնթոնի Բլինկենը, պաշտպանության նախարար Լլոյդ Օսթինը և Շտաբների պետերի միացյալ կոմիտեի նախագահ Մարկ Միլին, ինչպես նաև մի շարք գերատեսչությունների ղեկավարներ և ամերիկացի հայտնի գործիչներ։