Երևան ժամանած ադրբեջանցի պատգամավորները և՛ երեկ, և՛ այսօր հրաժարվել են մասնակցել ընթրիքին․ ո՞րտեղ են ընթրում նրանք

«Եվրանեսթ»-ին մասնակցելու նպատակով Հայաստան ժամանած Ադրբեջանի պատգամավորները հրաժարվել են մասնակցել այսօր նախատեսված ընթրիքին, որ պետք է տրվեր պատվիրակության անդամների պատվին: ArmLur.am-ի տեղեկություններով, ադրբեջանական պատվիրակության անդամ-պատգամավորները փակվել են հյուրանոցում եւ սնվում են հենց այնտեղ:

 

Մամուլում հայտնված տեղեկությունների համաձայն էլ «Յասաման» ռեստորանը չեղարկել է Հայաստան ժամանած ադրբեջանցիներին հյուրընկալելու ու հյուրասիրելու պայմանավորվածությունը. տեղեկությունը Կ. Դեմիրճյանի անվան մարզահամերգային համալիրի մոտ կազմակերպված բողոքի ակցիայի ժամանակ հանրայնացրեց «Քաղաքացիական գիտակցություն» հ/կ նախագահ Նարեկ Սամսոնյանը:
 

168.am-ը մանրամասներին տեղեկանալու համար կապ է հաստատել «Յասաման» ռեստորանի տնօրինության հետ:

Լրատվականի հետ զրույցում որպես ռեստորանի ղեկավար  ներկայացած Արուսը չի ցանկացել բացել փակագծերը՝ նկատելով, որ նման հարցեր չեն քննարկում:

«Եթե ձեզ շատ հետաքրքիր է՝ տվյալ պատվիրակությունը լինելո՞ւ է մեզ մոտ, թե՞ ոչ, երեկոյան Ձեզ հրավիրում եմ «Յասաման» ռեստորան՝ տեսնելու: Ես հիմա գրանցման, չեղարկման, հաստատման մասին որևէ տեղեկություն չեմ կարող փոխանցել. դրա իրավունքը, կարծում եմ, չունեմ էլ»,- ասել է  նա: