«Սպուտնիկ V» պատվաստանյութը դեռ չի գրանցվել. ինչ է ասում ԱՀԿ-ն
Առողջապահության համաշխարհային կազմակերպությունը դեռեւս չի կարող վերջնական ամսաթիվ նշել ռուսական «Սպուտնիկ V» պատվաստանյութը գրանցելու համար։ Այս մասին հայտարարել է Ռուսաստանում եվրոպական տարածաշրջանային գրասենյակի ներկայացուցիչ Մելիտա Վույնովիչը, հաղորդում է ՏԱՍՍ-ը։
«Մենք հիմա որեւէ կանխատեսում չենք անի, սակայն կարելի է ասել «so far, so good» («դեռեւս ամեն ինչ կարգին է»),- ասել է նա:
Վույնովիչն ընդգծել է, որ պատվաստանյութի գրանցման գործընթացը բոլորի համար նույնն է։ Անցած տարվա աշնանը եւ այս ձմռանը ներկայացված փաստաթղթերը ներկայումս վերանայվում են, իսկ դրա ավարտից հետո նախատեսվում են տեղում ստուգումներ։
Դեկտեմբերի վերջին ԱՀԿ-ի եվրոպական տարածաշրջանային գրասենյակի ղեկավար Հանս Կլյուգեն ՏԱՍՍ-ին տված հարցազրույցում հայտարարել էր, որ հույս ունի, որ ռուսական պատվաստանյութի հաստատման գործընթացը կավարտվի որքան հնարավոր է շուտ։ Կլյուգեն հերքել է, որ ռուսական պատվաստանյութի հաստատման այդքան երկար գործընթացը հարցի քաղաքականացում է։ Նա նշել է, որ պատվաստանյութի հաստատման գործընթացը նույնն է բոլոր արտադրողների համար, որոնք պետք է համապատասխանեն նույն չափանիշներին, ինչ մնացածը։
