ՏԵՍԱՆՅՈՒԹ․ Արարատ Միրզոյանն էլ է պատրաստվում թողնել ծխելը․ գործադիրում կրկին ծխախոտի թեման էր

Կառավարության այսօրվա նիստում քննարկվեց «Ծխախոտային արտադրատեսակների փոխարինիչների անվտանգության տեխնիկական կանոնակարգը հաստատելու» մասին նախագիծը: Էկոնոմիկայի նախարար Վահան Քերոբյանը հիշեցրեց, որ ՀՀ կառավարությունը քաղաքական լուրջ որոշում է կայացրել ծխախոտի ու դրա փոխարինիչների սահմանափակումների վերաբերյալ: 

Նա նշեց, որ ծխախոտային արտադրատեսակների ու դրանց փոխարինիչների օգտագործման հետևանքով առողջությանը հասցվող վնասի նվազեցման ու կանխարգելման մասին օրենքի պահանջներով պետք է սահմանվեն նաև ծխախոտային արտադրատեսակների փոխարինիչների անվտանգության տեխնիկական կանոնակարգը, որ կարողանան կարգավորեն նաև սրանք: Վարչապետ Նիկոլ Փաշինյանն էլ ասաց, թե խանութում մարդը չպետք է տեսնի, որ ստենդի հետևում ծխախոտ կա դրված:

 «Ծխելը թողնել պատրաստվող» Արարատ Միրզոյանն էլ հետաքրքրվեց, թե մասնագիտացված ծխատոտի խանութներում ո՞նց է իրականացվում վաճառքը, վարչապետն ասաց, թե կապ չունի՝ որտեղ է: Նիկոլ Փաշինյանը հիշեցրեց, որ մարտի 15-ից փակ տարածքներում արգելվում է ծխելը: Առողջապահության նախարար Անահիտ Ավանեսյանն էլ ասաց, որ ծխելու արգելքի կանոններն արդեն իսկ ուժի մեջ են մտնել բժշկական հաստատություններում կամ աշխատանքի վայրում: