Ինչ վիճակում են գազատարին բախված մեքենայի վարորդն ու տուժած հրշեջը. մանրամասներ

 Երեւանի Արտաշիսյան փողոցի սկզբնամասում երեկ՝ հունվարի 13–ին, հրդեհի բռնկմամբ տեղի ունեցած ՃՏՊ–ի հետեւանքով Այրվածքաբանության ազգային կենտրոն տեղափոխված վարորդի վիճակը շարունակում է մնալ կայուն ծանր։ Այս մասին NEWS.am-ի հետ զրույցում ասաց կենտրոնի բուժգծով փոխտնօրեն Կարինե Բաբայանը։

«Այրվածքային շոկով եւ շնչուղիների այրվածքներով պացիենտը գտնվում է վերակենդանացման բաժանմունքում։ Ամեն ինչ արվում է նրա առողջական վիճակի կայունացման համար։ Ստացած այրվածքները 2–րդ, 3–րդ, 4–րդ կարգի են»,– ասաց Կարինե Բաբայանը։

Նշենք, որ հրդեհաշիջման աշխատանքներ իրականացնելիս տուժել էր նաեւ հրշեջ-փրկարար Է․ Մ․-ն։ Արտակարգ իրավիճակների նախարարությունից մեզ տեղեկացրին, որ նա ծխահարվել էր, այսօր դուրս է գրվելու հիվանդանոցից։

Հիշեցնենք՝ «Opel Zafira» մակնիշի ավտոմեքենան (վարորդ՝ Ա․ Հ․, ծնված 1945 թ․) դուրս էր եկել ճանապարհի երթեւեկելի հատվածից եւ բախվել Արտաշիսյան փողոցի թիվ 44/4 շենքին հարակից գազատար խողովակին, ինչի հետեւանքով տեղի էր ունեցել գազի արտահոսք՝ հրդեհի բռնկմամբ։

Փրկարարներն իրականացրել են տարահանման աշխատանքներ։

Այրվել են հարակից շենքի բնակարանների պատուհանները և 9 պատշգամբում՝ կենցաղային իրեր: