Պայմանավորվածություն եղել է. մինչև երբ կարող էին ՀՀ քաղաքացիներն օգտագործել Գորիս-Կապան ճանապարհը

Հանրային հեռուստաընկերության եթերում ԱԽ քարտուղար Արմեն Գրիգորյանը հայտնել է, որ եղել է պայմանավորվածություն այն մասին, թե որքան ժամանակ Գորիս-Կապան ճանապարհը մնա Հայաստանի վերահսկողության ներքո:
 

«Ընդհանուր առմամբ, այդպիսի պայմանավորվածություն եղել է։ Պայմանավորվածությունը, ընդհանուր առմամբ, եղել է այն տրամաբանության շուրջ, որ մինչև այլընտրանքային ճանապարհ ունենալը մենք օգտագործելու ենք այդ ճանապարհը։ Իհարկե, այս ընթացքում որոշ խոչընդոտներ ստեղծվել են, բայց մինչև երեկ ՀՀ քաղաքացիներն այդ ճանապարհն օգտագործել են», - ասել է նա։
 

Զրույցի ընթացքում ԱԽ քարտուղարը ևս մեկ անգամ հաստատել է Գորիս-Կապանի շուրջ ադրբեջանցիների հետ պայմանավորվածության փաստը՝ նշելով․ «Նախնական պայմանավորվածությունը, ինչպես արդեն նշեցի, որ որոշակի ժամանակ մենք օգտագործենք այդ ճանապարհը, մինչև այլընտրանք ունենանք։ Միայն դրա շուրջ է եղել պայմանավորվածությունը»։