Միրզոյանն ու Բայրամովը Փարիզում հանդիպել են. Ֆրանսիայի ԱԳՆ
Ֆրանսիայի արտգործնախարար Ժան-Իվ Լը Դրիանը հանդիպել է Ադրբեջանում և Հայաստանում իր գործընկերներ Ջեյհուն Բայրամովի և Արարատ Միրզոյանի հետ: Քննարկվել է Լեռնային Ղարաբաղում տիրող իրավիճակը, հայտնում է Ֆրանսիայի ԱԳՆ մամուլի ծառայությունը։
«Լեռնային Ղարաբաղում ռազմական գործողությունների ավարտից մեկ տարի անց Ժան-Իվ Լը Դրիանը ընդունեց Ջեյհուն Բայրամովին և Արարատ Միրզոյանին։ Նա նախ առանձին, ապա համատեղ հանդիպում է անցկացրել ԵԱՀԿ Մինսկի խմբի հովանու ներքո»,- ասվում է տարածված հաղորդագրության մեջ։
Ըստ Ֆրանսիայի ԱԳՆ հայտարարության՝ այս բանակցությունների ընթացքում ֆրանսիացի դիվանագետը վերահաստատել է իր ցանկությունը՝ նպաստելու կողմերի միջև երկխոսության ակտիվացմանը՝ ի շահ Հարավային Կովկասում երկարաժամկետ խաղաղության։
Նա նաև ընդգծել է, որ «Ֆրանսիան հանդես է գալիս այդ նպատակին հասնելու համար ԵԱՀԿ Մինսկի խմբի համանախագահների ակտիվ ջանքերի կողքին»։
Լը Դրիանը պատրաստակամություն է հայտնել քաղաքական մակարդակով բանակցություններ վարել Ադրբեջանի և Հայաստանի իր գործընկերների հետ։
