Էրդողան․ Թրամփը խոստացել է F-35-ների հարցում, սպասում ենք խոստման կատարմանը

Թուրքիայի նախագահ Ռեջեփ Թայիփ Էրդողանը հայտարարել է, որ ԱՄՆ նախագահ Դոնալդ Թրամփից խոստում է ստացել F-35 կործանիչների հարցի վերաբերյալ և այժմ ակնկալում է դրա կատարումը։

Al Jazeera հեռուստաալիքին տված հարցազրույցում Էրդողանն ընդգծել է, որ F-35-ների շուրջ խնդրի կարգավորման վերաբերյալ իր ակնկալիքները պահպանվում են։

«Մենք Թրամփից F-35 կործանիչների վերաբերյալ խոստում ենք ստացել և սպասում ենք, որ նա կկատարի այդ խոստումը», — ասել է Թուրքիայի նախագահը։

Թուրքիան 2019 թվականին դուրս էր մնացել F-35 կործանիչների միջազգային ծրագրից՝ Ռուսաստանից С-400 զենիթահրթիռային համակարգեր ձեռք բերելուց հետո։ Վաշինգտոնը պնդում էր, որ ռուսական համակարգերի շահագործումը կարող է վտանգ ներկայացնել F-35-ների տեխնոլոգիաների, մասնավորապես՝ դրանց ցածր նկատելիության հնարավորությունների համար։

2020 թվականին ԱՄՆ-ն С-400-ների ձեռքբերման պատճառով Թուրքիայի նկատմամբ պատժամիջոցներ սահմանեց CAATSA օրենքի շրջանակում։

Հուլիսին Անկարայում կայացած ՆԱՏՕ-ի գագաթնաժողովի ընթացքում Թրամփը հայտարարել էր, որ իր վարչակազմը մտադիր է վերացնել Թուրքիայի նկատմամբ CAATSA-ի շրջանակում սահմանված պատժամիջոցները։ Նա նաև չէր բացառել Թուրքիայի վերադարձը F-35 ծրագրին։

Այդուհանդերձ, ամերիկյան կործանիչների մատակարարման հարցը դեռևս լուծված չէ։ ԱՄՆ Կոնգրեսում պահպանվում է հնարավոր գործարքի նկատմամբ դիմադրությունը, իսկ 2020 թվականին ընդունված ամերիկյան օրենսդրությունն արգելում է Պենտագոնին F-35 կործանիչներ փոխանցել Թուրքիային, քանի դեռ Անկարան տնօրինում է ռուսական С-400 համակարգերը։