ՏԵՍԱՆՅՈՒԹ. Ինչ էր ասում ընդդիմադիր պատգամավոր Փաշինյանը, երբ աշխատասենյակներում փակցված էր Սարգսյանի նկարը
168.am-ը հիշեցնում է ` ընդդիմադիր պատգամավոր Նիկոլ Փաշինյանը հաճախ էր անդրադառնում պաշտոնյաների սենյակներում այն ժամանակ ՀՀ նախագահ Սերժ Սարգսյանի նկարը փակցնելու փաստին: 2016թ․ սեպտեմբերի 14-ին ԱԺ նիստի ընթացքում էլ, երբ քննարկվում էր Արթուր Դավթյանին գլխավոր դատախազ նշանակելու հարցը, Փաշինյանն ասել էր.
«Բա Ձեր կարծիքով Սերժ Սարգսյանի նկարներն իրենց սենյակներում ինչի՞ են կախում: Նրանք անընդհատ խոսում են, դատախազները, քննիչները կաբինետներում զեկուցում են, հարցնում են՝ այս սպանությունը քրեական հանցագործությո՞ւն է, թե՞ չէ, և Սերժ Սարգսյանի նկարը նրանց բացատրում է, բացատրելով իրավակիրառ պրակտիկան համաշխարհային, պրեզումցիայի և սանկցիայի ներքին տրամաբանությունները՝ բացատրում է, թե որ սպանությունն է քրեական, որն ապաքրեական: Այդ նկարը մշտական կապի խնդիր է, ամեն օր իրիկունները զեկուցում են, առավոտները հրահանգ են ստանում»:
Այսպիսի համոզմունքներ ունեցող Նիկոլ Փաշինյանի՝ վարչապետ ընտրվելուց 4 տարի անց իրավիճակ է փոխվել: Պաշտոնյաների սենյակներում սկսել է հայտնվել արդեն նրա նկարը:
Այսօր Կառավարության նիստից հետո լրագրողները Արդարադատության նախարար Կարեն Անդրեասյանին հարցրին, թե ինչո՞ւ է իր գլխավերևում կախել Նիկոլ Փաշինյանի մեծադիր նկարը:
«Ընդհանրապես պետության ղեկավարի լուսանկարը խորհրդանիշ է, և, այո, լինում է ժամանակ, երբ աշխատանքային գործունեության ժամանակ, նայելով լուսանկարին՝ հիշում եմ, որ պետք է լինել ազնիվ, անաչառ և պահպանել այն բոլոր պահանջները, որ մեր առաջ դրել է վարչապետը»,- ասել էր Անդրեասյանը:
Նախարարի այս պնդմանն արձագանքենք ռետրո Նիկոլ Փաշինյանի 2016թ․ օգոստոսի 19-ի ֆեյսբուքյան գրառմամբ.
«Պետական սիմվոլ եք ուզում՝ զինանշան կախեք, դրոշ կախեք»:
