Ովքեր են տեղադրում Պուտինի և հայ-ռուսական բարեկամության թեմաներով պաստառները․ ArmDaily
Հանրապետության տարբեր քաղաքներում տեղադրված են ՌԴ նախագահ Վլադիմիր Պուտինի, Կրեմլի ու ՀՀ կառավարության պատկերներով պաստառներ՝ «Հավերժ միասին», «Հավերժ Ոուսաստանի հետ» մակագրությամբ։ Պաստառների մի մասի վրա տեսանելի է Հայաստանի կոմունիստական կուսակցության անվանումը։
Կուսակցության գրասենյակից ArmDaily.am-ին հայտնեցին, որ պաստառների առնչությամբ կուսակցությունը հանդես կգա հայտարարությամբ։ Մեզ փոխանցեցին, որ Կուսակցությունը տեղադրել է միայն Մարշալ Բաղրամյանի, Ստեփան Շահումյանի և Հայ-ռուսական բարեկամության թեմաներով պաստառներ։ «ՌԴ նախագահի նկարով պաստառը չի տեղադրել Հայաստանի կոմունիստական կուսակցությունը»,-հայտնեցին կուսակցությունից։ Մեր հարցին, թե արդյոք դրանք տեղադրվել են ՏԻՄ նախընտրական քարոզարշավի շրջանակներում՝ հաշվի առնելով, որ Կոմկուսը առաջադրվել է թե Գյումրիում, թե Գորիսում, պատասխանեցին, որ ոչ, դրանց տեղադրումը սկսվել է քարոզարշավից առաջ, ու նպատակը կուսակցության շարքերի համալրումն է, որպեսզի մարդիկ գան, հետաքրքրվեն ու համալրեն կուսակցության շարքերը։ ՌԴ նախագահ Վլադիմիր Պուտինի նկարով պաստառ տեղադրված է նաև Գորիսում։
Գորիսի փոխքաղաքապետ Կարեն Քոչարյանը ArmDaily.am-ին ասաց, որ Գորիսի համայնքապետարանը վարձակալությամբ տարածք է հատկացրել։ «Երկու խումբ է, որոնցից մեկը Կապանում է, մյուսը՝ Գորիսում։ Իրենք վարձակալում են ու տեղադրված պաստառների համար մուծումներ են անում, թե ում պատվերն է՝ տեղյակ չենք, դրանց վերահսկողությունը մեր վրա չէ»։ Հարցին, թե հնարավոր է, որ կառավարության կամ պետական նախաձեռնությունը լինի՝ նա պատասխանեց, որ չի կարող ասել։ «Պատվեր է, ով է պատվիրատուն՝ չգիտեմ»։
