Փանջշերում շարունակում են մարտեր մղել թալիբների դեմ

Հակաթալիբանական դիմակայության ուժերը շարունակում են պայքարը շարժման գրոհայինների դեմ: «ՌԻԱ Նովոստի»-ի փոխանցմամբ՝ այս մասին իր թվիթերյան էջում հայտնել է դիմակայության ուժերի ներկայացուցիչ Ալի Նազարին: 

«Հայրենակիցները, Փանջշեր նահանգի Գինդուկուշ և Անդարաբ շրջանների արծիվներն ու առյուծներն այսօր հերոսաբար մաքրում են մեր տունը կեղտից, որը ժամանել է այս շաբաթ»,- ասվում է Նազարիի հաղորդագրության մեջ: 

Հիշեցնենք, որ թալիբներն ակտիվ գործողությունների են անցել երկրից ամերիկյան զորքերի դուրսբերմանը զուգահեռ՝ մի շարք նահանգներ և քաղաքներ գրավելով՝ նաև սահմանամերձ շրջաններում: Օգոստոսի 15-ին թալիբները մտել են մայրաքաղաք Քաբուլ, ինչից ժամեր անց երկրի նախագահ Աշրաֆ Ղանին հեռացել է երկրից: «Թալիբանն» ավելի ուշ հայտնել էր 12 անձից կազմված կառավարման խորհուրդ ստեղծելու մասին: Օրերս հայտնի է դարձել, որ թալիբների կազմած նոր կառավարությունը գլխավորելու է մոլլա Աբդուլ Ղանի Բարադարը: 

Թալիբներին դիմադրություն է ցույց տալիս միայն երկրի հյուսիսում գտնվող Փանջշեր նահանգը: