ՏԵՍԱՆՅՈՒԹ. «Էսի վրես ազդում ա». ահա, թե ինչ է կատարվում Զվարթնոց օդանավակայանում
Auroranews-ը մի խումբ քաղաքացիներից ահազանգ է ստացել՝ Զվարթնոց միջազգային օդանավակայանի սպասարկման հետ կապված: Քաղաքացիները նշում են, որ թեև գիշերվա ընթացքում միանգամից 3 ինքնաթիռ է վայրէջք կատարում, սակայն օդանավակայանի անցակետային համարվող 14 պատուհաններից աշխատում է միայն կեսը:
Auroranews-ի թղթակիցը ևս եղել է այս քաղաքացիների մեջ և հավաստեց, որ մեր ստացած ահազանգը համապատասխանում է իրականությանը: Ավելին, հավելեց, որ ինքն էլ տեղում փորձել է լուսաբանել խնդիրը, հասկանալ, թե ինչու՞ է նման իրավիճակ, սակայն սպառնացել են, որ կտուգանեն տարածքում նկարահանում իրականացնելու համար: Օդանավակայանի աշխատակիցները կարծելով, թե մեր թղթակիցը օտարազգի է՝ բարձրաձայն են. «Էսի վրես ազդում ա»:
Դրանից հետո մեր աշխատակցին հրավիրել են սենյակ և փորձել պարտադրել, որ հեռախոսից ջնջի տեսանյութը:
Նմանատիպ վերաբերմունքի են արժանացել նաև մյուս քաղաքացիները, որոնք եղել են խնդիրը բարձրաձայնողների ցանկում:
Նշենք, որ համացանցում ամեն օր հրապարակվում են բազմաթիվ տեսանյութեր Զվարթնոց օդանավակայանից, և կարծես թե դրանք նկարելուն աշխատակիցները դեմ չեն եղել, սակայն իրավիճակը կտրուկ փոխվում է, երբ խնդիրը լուսաբանելու համար է նկարահանումը եղել:
«Մեզանից ուզում են Քովիդ թեստի բացասական պատասխան, սակայն իրենք այնպես են աշխատում, որ հենց օդանավակայանում կարելի է վարակվել: Այսինքն՝ այդ թուղթը գումար աշխատելու միջոց է, որը միայն ձևական բնույթ է կրում»,- նշեցին մեզ զանգահարած քաղաքացիները:
