Սպասում ենք կոնկրետ առաջարկների. Փաշինյանը՝ տարածաշրջանում խաղաղության հաստատման մասին
Եթե սադրիչ հայտարարությունների հետագծելիության հարցը մեծ բարդություն չի ներկայացնում՝ սադրիչ գործողությունների և հրադադարի ռեժիմի խախտումներ նախաձեռնող կողմի հարցը մշտապես բանավեճերի տեղիք է տալիս։ Այս մասին այսօր կառավարության նիստի ընթացքում հայտարարեց վարչապետ Նիկոլ Փաշինյանը։
Նա ևս մեկի անգամ նշեց ՀԱՊԿ և ԵԱՀԿ Մինսկի խմբի համանախագահության նշանակությունը տարածաշրջանում կայունության ապահովման գործընթացում և վերահաստատեց արդեն իսկ հայտարարված դրույթները։
«Նախկինում ասել եմ, հիմա էլ կարծում եմ, որ հրադադարի խախտումների նախաձեռնող կողմի նույնականացումը և այդ սադրիչ գործողության հասցեական դատապարտումը էական նշանակություն ունի իրադրության հետագա դեէսկալացիայի և կայունացման համար։ Այսուհանդերձ նման գործառույթը դժվար է պատկերացնել առանց միջազգային մոնիտորինգի մեխանիզմի գործարկման»,- ասաց Փաշինյանը։
Վարչապետը նշեց, այդ մեխանիզմենրեից է ՀԱՊԿ դիտորդական առաքելությունը, իսկ եթե ՀԱՊԿ-ի համար դա ընդունելի չէ այլընտրանքը մնում է ԵԱՀԿ Մինսկի խմբի համանախագահության դիտորդական առաքելությունը։
«Վերադառնալով Ադրբեջանի հետ բանակցությունները վերսկսելու ԵԱՀԿ Մինսկի խմբի համանախագահության կոչին՝ Հայաստանը պատրաստ է բանակցային գործընթացում ներգրավել թե բարձր, թե բարձրագույն մակարդակում, և սպասում ենք կոնկրետ առաջարկների։ Հայաստանի, Արցախի և տարածաշրջանի համար խաղաղ զարգացման դարաշրջան բացելու, մեր ժողովրդից ստացած մանդատը կառավարության վրա դնում է հատուկ պատասխանատվություն։ Այս խնդիրը լուծելու համար մենք պետք է լինենք առավելագույնս ակտիվ և ճկուն։ Մեր տրամադրությունը և տրամադրվածությունը պետք է լինի հետևյալը՝ առավելագույնը անել օրակարգում առկա խնդիրներով լուծումների գնալու համար»,- ասաց Փաշինյանը։
Նա նշեց, որ հարցեր կան, որոնք արագ են լուծվում, բայց հարցեր կան, որոնք երկարատև ժամանակ են պահանջում։
«Նման հարցերից մեկը, որը կարծում եմ, հնարավոր է բավական արագ լուծել տարածաշրջանային կոմունիկացիաների բացումն է, տարածաշրջանային ապաշրջափակման օրակարգը և կարծում եմ պետք է օր առաջ վերսկսենք աշխատանքները փոխվարչապետերի եռակողմ ձևաչափում և լինենք առավել ակտիվ և նախաձեռնող տարածաշրջանում նոր կոմունիկացիոն և տնտեսական հնարավորությունների իրագործման տեսանկյունից»,- ասաց Փաշինյանը։
