Սյունիքի օդանավակայանը ձեր պատճառով դարձել է սահմանին հարակից. դրանից ինչու՞ չեք խոսում. Հակոբյանը՝ ՔՊ-ական պատգամավորներին
Խոսում եք կոռուպցիոն ռիսկերից, բայց հուլիս ամսվա ընթացքում Սյունիքում բաշխվել է 6 մլրդ 800մլն դրամ՝ 3 ընկերությունների միջև: Սա ինչ է՞, այլ ընկերություն չկա՞ր, ինչու՞ մրցույթ չի հայտարարվել: Այս մասին ԱԺ-ում ասաց «Հայաստան» խմբակցության պատգամավոր, Սյունիքի նախկին մարզպետ Վահե Հակոբյանը՝ արձագանքելով իր հասցեին ուղղված իշխանական պատգամավորների մեղադրանքներին:
Խոսելով իր մարզպետ եղած ժամանակ Սյունիքում իրականացված բարեփոխումների մասին՝ Վահե Հակոբյանը նշեց, որ Սյունիքում օդանավակայան են կառուցել, որի համար ծախսվել է 9 մլրդ դրամ.
«Այդ օդանավակայանը պատրաստ էր շահագործման, բայց ձեր պատճառով այն դարձել է սահմանին հարակից: Հիմա որևէ մեկն իր վրա պատասխանատվություն չի վերցնում, որ ինքնաթիռը կթռնի Երևանից-Կապան և հակառակ ուղղությամբ: Դրանից ինչու՞ չեք խոսում, 90թ-ից սկսած՝ ո՞վ էր Հայաստանում օդանավակայան կառուցել»,-ասաց Վահե Հակոբյանը:
