Պուտինը Զելենսկիին խորհուրդ է տվել ուշադիր կարդալ Ուկրաինայի մասին իր հոդվածը

Կիևի իշխանությունները նախ պետք է կարդան և վերլուծեն «Ռուսների և ուկրաինացիների պատմական միասնության մասին» հոդվածը` նախքան այն քննարկելը: Այս մասին «Ռոսիա 24» հեռուստաընկերության եթերում ասել է Ռուսաստանի Դաշնության նախագահ Վլադիմիր Պուտինը, գրում է regnum.ru-ն: 

«Եթե բանավեճի ցանկություն կա, կարծում եմ, որ նրանք պետք է դադար վերցնեն, նախ ուշադիր կարդան այս հոդվածը, վերլուծեն, փաստաթղթեր վեր հանեն», - ընդգծել է ՌԴ ղեկավարը՝  մեկնաբանելով Ուկրաինայի նախագահ Վլադիմիր Զելենսկիի`Պուտինի հեղինակած հոդվածից որոշ բաներ քննարկելու  պատրաստակամությունը: 

«Այս վեճերը վաղուցվա են: Բավականին դժվար է վիճել այս հոդվածի շուրջ, քանի որ այն ազնիվ է: Դա իրապես հիմնված է պատմական փաստաթղթերի վրա », - ընդգծել է պետության ղեկավարը: 

Ավելի վաղ հաղորդվել էր, որ ՌԴ նախագահ Վլադիմիր Պուտինը հոդված է գրել ռուսների ու ուկրաինացիների պատմական միասնության մասին, այն հրապարակվել է Կրեմլի կայքում: 

Քաղաքացիների հետ վերջին ուղիղ կապի ընթացքում Պուտինը խոստացել էր, որ վերլուծական հոդված կգրի Ռուսաստանի և Ուկրաինայի վերաբերյալ, որում կհայտնի իր վերաբերմունքը գործի վերաբերյալ: Նա ընդգծել է, որ ռուս և ուկրաինացի ժողովուրդներին համարում է մեկ ամբողջություն: 


ՌԴ նախագահը նաև հույս է հայտնել, որ իր հոդվածին կծանոթանան ոչ միայն Ռուսաստանի, այլ նաև Ուկրաինայի քաղաքացիները: