Նաիրա Զոհրաբյանը՝ այսօրվա ԱԺ նիստում ԲՀԿ-ի մասնակցության մասին
Ըստ մամուլում շրջանառվող տեղեկությունների՝ Բարգավաճ Հայաստան կուսակցությունն այսօր չի մասնակցելու ԱԺ-ում վարչապետի ընտրության հարցի քննարկմանը: Տեղեկությունը ճշտելու նպատակով Auroranews-ը կապ հաստատեց ԱԺ ԲՀԿ խմբակցության պատգամավոր Նաիրա Զոհրաբյանի հետ: Վերջինս նշեց.«Վարչապետի թեկնածու առաջադրել-չառաչադրելու մասով քաղաքական պայմանավորվածություն կա՝ այդ պատճառով առանձին պատգամավորներով որոշում են կայացրել նիստին չմասնակցել»:
Հիշեցնենք, որ հունիսի 20-ին արտահերթ ընտրություններ կայանալու համար ապրիլի 25-ին Նիկոլ Փաշինյանը հրաժարական ներկայացրեց վարչապետի պաշտոնից:
Համաձայն Սահմանադրության` վարչապետի հրաժարական ներկայացնելու կամ վարչապետի պաշտոնը թափուր մնալու այլ դեպքերում Կառավարության հրաժարականն ընդունվելուց հետո` յոթնօրյա ժամկետում, Ազգային ժողովի խմբակցություններն իրավունք ունեն առաջադրելու վարչապետի թեկնածուներ: Ազգային ժողովը վարչապետին ընտրում է պատգամավորների ընդհանուր թվի ձայների մեծամասնությամբ:
Վարչապետ չընտրվելու դեպքում քվեարկությունից յոթ օր հետո անցկացվում է վարչապետի նոր ընտրություն, որին մասնակցելու իրավունք ունեն պատգամավորների ընդհանուր թվի առնվազն մեկ երրորդի առաջադրած վարչապետի թեկնածուները: Եթե պատգամավորների ընդհանուր թվի ձայների մեծամասնությամբ վարչապետ չի ընտրվում, ապա Ազգային ժողովն արձակվում է իրավունքի ուժով:
