Նիկոլ Փաշինյանը և Էդմոն Մարուքյանը վաղը կհանդիպեն

Ես առաջարկ եմ արել, որին հասկանալի, հոդաբաշխ արձագանք չի եղել։ Այս մասին լրագրողների հետ զրույցի ժամանակ ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

«Եղել է վարչապետի հայտարարությունը՝ մարտահրավեր նետելու մասին։ Հայ ազգը մի մարտահրավեր ուներ, վարչապետի գլխավորությամբ գնաց այդ մարտահրավերին և ջախջախիչ պարտություն ենք կրել։ Ինչ վերաբերում է արտահերթ ընտրություններին, ապա առավոտյան ինձ հետ կապ է հաստատել վարչապետը և առաջարկել հանդիպում՝ քննարկելու այն ամենը, ինչի մասին խոսում ենք։ Ենթադրում եմ՝ վաղը կհանդիպենք»,-նշեց պատգամավորը՝ հավելելով, որ վարչապետի հետ հանդիպման ժամանակ կքննարկեն բոլոր առաջարկները։

Էդմոն Մարուքյանը, անդրադառնալով վարչապետի այն հայտարարությանը, որ ԳՇ պետ Օնիկ Գասպարյանը Սերժ Սարգսյանի հրամանն է կատարել այդ փաստաթուղթը ստորագրելու համար, ասաց․ «Ես ապացույցներ եմ պահանջել վարչապետից, որ հրապարակի դրանք։

Պնդում եմ, որ դրանք պետք է հրապարակվեն։ Ուզում եմ մարդիկ տեսնեն, թե որքանով է վարչապետի խոսքն իրականություն»,-ասաց Էդմոն Մարուքյանը։